Այգեպարում կրակում են ամեն օր` մարդկանց և մեքենաների ուղղությամբ

Տավուշի մարզի Այգեպար գյուղն այս պահին հանգիստ վիճակում է, բայց ոչ ոք չի կարող հստակ ասել, թե այդ հանգստությունը քանի րոպե կարող է տևել:

Այսօր առավոտյան ևս գյուղի ուղղությամբ ադրբեջանական կողմից կրակահերթ է բաց թողնվել:

Armlur.am-ի հետ զրույցում Այգեպարի գյուղապետ Անդրանիկ Այդինյանը նշեց, որ իրենք չգիտեն` ինչ է նշանակում հրադադար կամ հանգիստ:

«Կրակում են տարբեր պահի, տարբեր ուղղությամբ. առավոտ, իրիկուն, մարդկանց և կենդանիների ուղղությամբ»,- ասաց գյուղապետը:

Վերջինիս խոսքով` այսօրվա կրակոցից գյուղն առայժմ վնաս չի կրել: Բայց, գյուղապետի գնահատմամբ, երբեք չես կարող իմանալ, թե կրակոցի հաջորդ ձայնը երբ կլսեն և ինչ հետևանքներ այն կունենա:

Այգեպարցիների համար կրակոցները սովորական և բնական երևույթ են դարձել:

Տաթև Հարությունյան