«Պենտեկոստե» կրոնական կառույցի գործունեության մասին armlur.am-ը մի քանի անգամ անդրադարձել է. մասնավորապես, ինչպես հայտարարել են Միացյալ երիտասարդական լիգայի ներկայացուցիչները, կրոնական այդ կառույցը ծավալում է քայքայիչ գործունեություն:
Միացյալ երիտասարդական լիգայի համանախագահ Սևակ Հովհաննիսյանն armlur.am-ի հետ զրույցում ներկայացրեց նոր մանրամասներ. «Պենտեկոստե» կրոնական կառույցը զբաղվում է ոչ միայն հոգեորսությամբ, այլև՝ դրամաշորթությամբ, ավելին` Խարբերդի մանկատնից «Պենտեկոստե»-ի ղեկավար Նինել Մովսիսյանը որդեգրել է մի հիվանդ երեխայի, ում, Սևակ Հովհաննիսյանի պնդմամբ, շահագործում են, իսկ ավելի կոնկրետ` որդեգրված այդ երեխան մաքրում է Նինել Մովսիսյանի աղջիկների բնակարանները:
«Պենտեկոստե-ից» տուժած մարդիկ են դիմել մեզ, որոնցից մեկն այս պահին ապրում է ԱՄՆ-ում: Նա մեզ ուղարկել է 60.000 դոլարի չեք, որտեղ գրված է` ինչ գումարներ է փոխանցել սպառնալիքի տակ կրոնական այդ կառույցին: Հետևաբար, «Պենտեկոստե» կրոնական կառույցը զբաղվում է ոչ միայն հոգեորսությամբ, այլև՝ թալանչիությամբ»,- վստահեցնում է Սևակ Հովհաննիսյանը:
Armlur.am-ին հաջողվեց կապ հաստատել «Պենտեկոստե» կրոնական կառույցի ղեկավար Նինել Մովսիսյանի դստեր` Անուշ Շիրինյանի հետ: Վերջինս, լսելով մոր հասցեին ուղղված ՄԵԼ համահիմնադիր Սևակ Հովհաննիսյանի մեղադրանքները, հերքեց դրանք: Անուշ Շիրինյանի պնդմամբ՝ իրականում ինքը դարձել է Սոնա Ավագյանի խաբեության զոհը:
Մեր զրուցակցի պնդմամբ՝ նախորդ տարի ինքը, սկայպով ծանոթանալով Սոնա Ավագյանի հետ, որը ևս, իր խոսքերով «հավատքի ու հոգևոր մարդ է», մոտավորախես 45.000 դոլար արժողությամբ «Օրիֆլեյմ» ընկերության ապրանքներ է ուղարկել ԱՄՆ՝ Սոնա Ավագյանին` վաճառելու և ստացվելիք հասույթը հավասար բաժանելու նպատակով: Բացի ապրանքներից` Անուշ Շիրինյանը Սոնային ուղարկել է նաև մոտ 2000 դոլար արժողությամբ շղթա, որը Սոնան խոստացել է վաճառել այնտեղ 4000 դոլարով, սակայն, ինչպես հավաստիացնում է Անուշ Շիրինյանը, ինքը ո՛չ շղթայի գումարն է ստացել, ո՛չ էլ շղթան:
Տեղեկացնենք, որ Անուշ Շիրինյանն «Օրիֆլեյմ» ընկերության գրասենյակներից մեկի տնօրենն է:
Ըստ նրա` Սևակ Հովհաննիսյանը կանգնած է խաբեբաների ու շանտաժ անողների կողքին:
«Ասում է` մենք շահագործում ենք որդեգրված երեխային: «Սուտ է, նման բան չկա: Այդ երեխան, որը իմ քույրն է` Անի Շիրինյանը, պատրաստ է պատիվ պահանջելու Սևակ Հովհաննիսյանից»,- վրդովված ասաց կրոնական կառույցի ներկայացուցիչը:
Սակայն սա դեռ ամենը չէ: Անուշ Շիրինյանը նաև պնդում է, որ Սոնա Ավագյանը խաբել է ոչ միայն իրեն, այլև՝ տասնյակ մարդկանց, Հայաստանից «փախել ԱՄՆ», քանի որ ունեցել են մեծ թվով պարտքեր. «Սոնա Ավագյանը հիմա ԱՄՆ-ում ևս մի քանի մարդկանց գումարները յուրացրել է, ու այսօր նրա վրա դատական գործ կա»:
Մոտ մեկ տարի շարունակ որևէ գումար չստանալով` Անուշ Շիրինյանը, ինչպես ինքն է պնդում, հասկացել է, որ Սոնան իրեն խաբում է և չի հավատում այլևս Սոնայի այն հայտարարությանը, թե նրա ամուսինն, իբր, աղբն է թափել իր ուղարկած ապրանքները:
Անուշ Շիրինյանը պատրաստվում է թե´ Սևակ Հովհաննիսյանին, թե´ Սոնա Ավագյանին դատի տալ, քանի որ Սոնա Ավագյանն իրեն խաբել ու չի վերադարձրել 45.000 դոլար գումար, իսկ Սևակ Հովհաննիսյանին դատի է տալու զրպարտելու համար:
Մեզ հաջողվեց կապ հաստատել նաև ԱՄՆ-ում գտնվող Սոնա Ավագյանի հետ: Վերջինս, սակայն, հերքեց 45.000 դոլարի մասին Շիրինյանի մեղադրանքները` ասելով. «Այդ ապրանքները եղել են մոտ 600-700 դոլար արժողությամբ: Ես այդ չծախված ապրանքների դիմաց նրան ուղարկել եմ գումար և չէի ասել, որ ապրանքը չի վաճառվել, քանի որ վախենում էի, որ Աստված կպատժի օծյալի ապրանքը չվաճառելու համար:
Բայց երբ տեսա, որ ամեն ինչ շատ է ձգձգվում, ԱՄՆ-ում Անուշ Շիրինյանին ծանոթ մի կնոջ մոտ տարա ապրանքները, որ նա ետ ուղարկի Երևան: Անուշ Շիրինյանը շատ մեծ ախորժակ ունի: Ինքն ինձնից չվաճառված ապրանքի դիմաց 10.000 դոլար է ստացել: Ես կարող եմ մի թուղթ ուղարկել, որտեղ միջազգային բեռնափոխադրող «Ֆեդեքս» ընկերության ներկայացուցչությունը Հայաստանում գնահատել է, թե Անուշ Շիրինյանի կողմից ինձ ուղարկված ծանրոցում ինչքան ապրանք է եղել»:
Սոնա Ավագյանը պնդում է` ինքը Անուշ Շիրինյանի համար եղել է փողի աղբյուր, իսկ հիմա այդ աղբյուրը կտրվել է, ու նա դա ցավոտ են տանում:
«Ես որևէ մեկին որևէ բան պարտք չեմ»,- եզրափակեց Սոնա Ավագյանը:
Սոնա Դավթյան
.gif)
