Ինչպես է հայտնաբերվել փոսում թաղված կնոջ դին. նոր մանրամասներ` Հրազդանում տեղի ունեցած ողբերգությունից

Armlur.am-ն արդեն հայտնել էր, որ օգոստոսի 29-ին Կոտայքի մարզի Հրազդան քաղաքի տներից մեկի ավտոտնակում հայտնաբերվել է 80-ամյա կնոջ դի: Կնոջը սպանելու և հողի մեջ թաղելու մեջ կասկածվում է նրա որդին, ով հաշվառված է հոգեբուժարանում: Ոստիկանությունը նոր մանրամասներ է հաղորդում:

Օգոստոսի 28-ին, ժամը 21-ին, 1963 թ. ծնված Անահիտ Նազարյանը ոստիկանության Հրազդանի բաժնում հաղորդում է տվել, որ մայրը` 1935 թ. ծնված Արաքսյա Հարությունյանը, բնակվում է իր եղբոր` 1962 թ. ծնված Հայկազ Նազարյանի հետ, և եղբայրը շուրջ մեկ ամիս է թույլ չի տալիս տեսակցել մորը: Աղջիկը օգոստոսի 28-ին կրկին գնացել է եղբոր տուն, սակայն վերջինս դուռը չի բացել: Քույրը ճարահատյալ զանգահարել է ոստիկանություն և ոստիկանների միջամտությամբ մտնելով տուն` մորը այնտեղ չի գտել, իսկ եղբայրը հայտնել է, որ շուրջ մեկ ամիս է նա հեռացել է տնից, և ինքը մոր գտնվելու վայրի մասին տեղեկություն չունի:

Ոստիկանության Կոտայքի մարզային վարչության և Հրազդանի բաժնի ծառայողների ձեռնարկած օպերատիվ-հետախուզական միջոցառումների շնորհիվ՝ օգոստոսի 29-ին, ժամը 16-ին, Շահումյան փողոցի թիվ 154 տանը կից ավտոտնակի վերանորոգման փոսում, հողում թաղված վիճակում, հայտնաբերվել է Արաքսյա Հարությունյանի դիակը` բռնության հետքերով:
Նշանակվել է դատաբժշկական փորձաքննություն:
Փաստի առթիվ Կոտայքի մարզային քննչական վարչությունում ՀՀ քրեական օրենսգրքի 104 հոդվածի 1-ին մասի հատկանիշներով հարուցվել է քրեական գործ:
Կատարվում է նախաքննություն:

Լուսանկարը` Shamshyan.com-ի: