ՀՀ հատուկ քննչական ծառայությունում քննվող քրեական գործի նախաքննության ընթացքում հիմնավորվել է, որ քրեական դատավարության մասնակից Ալինա Ա.-ն հանցագործության կատարման մեջ հանիրավի մեղադրել է ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժնի քննիչ Ա. Համզոյանին:
Մասնավորապես՝ Աբովյանի քննչական բաժնի քննիչ Ա. Համզոյանը, 2014թ. հոկտեմբերի 4-ին ահազանգ ստանալով նույն օրը՝ ժամը 16:30-ի սահմաններում, Երևան-Գառնի ճանապարհին Պերճ Ա.-ի վարած «ԶԻԼ 131-Ն» մակնիշի և Ալինա Ա.-ի վարած «Միցուբիշի Կոլտ» մակնիշի ավտոմեքենաների վթարվելու և վթարի հետևանքով վերջինիս ավտոմեքենայի ուղևոր՝ Ռ. Ս.-ի մահվան դեպքի մասին, մեկնել է դեպքի վայր, որտեղ վարորդների, փորձագետի, ընթերակաների մասնակցությամբ կատարել է դեպքի վայրի զննություն՝ կազմելով ճանապարհատրանսպորտային պատահարի դեպքի վայրի զննության արձանագրություն, որի տակ ստորագրել են հիշյալ անձինք, բացի Ալինա Ա.-ից: Վերջինս պատճառաբանել է, թե երբ դեպքի վայր կժամանեն ազգականները, նոր կստորագրի քննիչի կողմից կազմված հիշյալ արձանագրության տակ, սակայն ազգականների դեպքի վայր ժամանելուց հետո ևս հրաժարվել է ստորագրել արձանագրության տակ:
Հիշյալ դեպքի առթիվ ՀՀ քննչական կոմիտեի Աբովյանի քննչական բաժնում քննիչ Ա.Համզոյանի կողմից ՀՀ քրեական օրենսգրքի 242-րդ հոդվածի 2-րդ մասով հարուցվել է քրեական գործ:
Այնուհետև նույն քրեական գործով մեղադրյալ Ալինա Ա.-ն Կոտայքի մարզի դատախազությունում հաղորդում է տվել այն մասին, թե, իբր, 2014թ. հոկտեմբերի 4-ին իր «Միտցուբիշի Կոլտ» մակնիշի և «ԶԻԼ 131-Ն» մակնիշի ավտոմեքենաների բախման դեպքի վայրի զննությունը կատարելիս քննիչ Ա. Համզոյանը զննության տվյալները գրառել է սպիտակ թղթի վրա, իսկ իրեն առաջարկել է ստորագրել ճանապարհատրանսպորտային պատահարի դեպքի վայրի զննության արձանագրության չլրացված ձևաթղթի տակ՝ պատճառաբանելով, որ սպիտակ թղթի վրա առկա տվյալները հետագայում լրացնելու է դեպքի վայրի զննության արձանագրության մեջ:
Դեպքի առթիվ ՀՀ հատուկ քննչական ծառայությունում հարուցված քրեական գործի նախաքննության ընթացքում պատշաճ ընթացակարգով ստուգվել են Ալինա Ա.-ի հաղորդման մեջ նշված դրվագների բոլոր հանգամանքները: Մասնավորապես՝ կատարվել են մի շարք քննչական գործողություններ, որի արդյունքում հիմնավորվել է, որ Ալինա Ա.-ն, նախազգուշացված լինելով ակնհայտ սուտ մատնություն կատարելու համար ՀՀ քրեական օրենսգրքի 333-րդ հոդվածով նախատեսված քրեական պատասխանատվության մասին, գիտակցելով, որ իր տրամադրած տեղեկությունները կեղծ են և չեն համապատասխանում իրականությանը, հանցագործության կատարման մեջ անհիմն մեղադրել է ՀՀ քննչական կոմիտեի Աբովյանի քննչական բաժնի քննիչ Ա. Համզոյանին:
Ակնհայտ սուտ մատնություն կատարելու համար Ալինա Ա.-ին մեղադրանք է առաջադրվել ՀՀ քրեական օրենսգրքի 333-րդ հոդվածի 1-ին մասով:
ՀՀ հատուկ քննչական ծառայությունում ավարտվել է քրեական գործի նախաքննությունը: Գործը մեղադրական եզրակացությամբ հանձնվել էդատավարական հսկողություն իրականացնող դատախազին՝ այն հաստատելու և դատարան ուղարկելու համար:
.gif)
