Այս հարցում որեւէ տեսակի խժդժություն չի լինելու. իմքայլական պատգամավորը՝ Արցախում կայանալիք ընտրությունների մասին

ԱԺ «Իմ քայլը» խմբակցության պատգամավոր Գոռ Գեւորգյանը «Ժողովուրդ» օրաթերթի հետ զրույցում հայտարարեց, որ ԱՄՆ Սենատի` Հայոց ցեղասպանության ճանաչման դափնին չի կարող վերագրել որեւէ իշխանության, քանի որ դա տարիների կատարած աշխատանքի արդյունք է:

-Պարո՛ն Գեւորգյան, ՀՀ վարչապետ Նիկոլ Փաշինյանը դեռեւս նոյեմբերին հայտարարել էր, որ Արցախի եւ Հայաստանի իշխանությունների պատկերացումները Լեռնային Ղարաբաղի Հանրապետության հարցի կարգավորման վերաբերյալ նույնական են: Ի վերջո, այս մեկ տարվա մեջ մենք ինչի՞ կարողացանք հասնել այս հարցում:

-Գիտեք, Արցախի հարցը այն ամենաբարդ հարցն է, որ ունի հայ ժողովուրդը եւ մեր ընդհանուր պետությունը, ու այս հարցում կա գործընթաց, եւ ենթադրում ենք, որ ունի հավանաբար իր տրամաբանական խնդիրները, եւ ենթադրում ենք, որ այն, ինչ որ արվել է, արվել է, որպեսզի այս եղած իրավիճակը մի փոքր այլ հարթակ տեղափոխել` ավելի ընկալելի, ավելի մոտենալ դեպի արցախյան հիմնախնդրի կարգավորմանը եւ, ամենակարեւորը, չունենալ պատերազմ:

-Նիկոլ Փաշինյանը հայտարարել էր նաեւ Արցախի` բանակցային սեղանի շուրջ վերադառնալու մասին, բայց, կարծես թե, այդ հարցում եւս հստակեցումներ չեղան: Ըստ Ձեզ` այդ տեսլականը որքանո՞վ է իրատեսական եւ իրագործելի այս ժամանակահատվածում:

-Դա առանցքային հարց է, ու մենք խորապես համոզված ենք, որ չի կարող լինել գլոբալ խաղաղություն, եթե հակամարտող կողմերից մեկը ներգրավված չէ բանակցային գործընթացում, որովհետեւ հակամարտության կարգավորման դասագրքային ճշմարտությունից է բխում նաեւ այն հանգամանքը, որ հակամարտող կողմն անպայման լինի լսելի, հակամարտող կողմերի թեզերը լինեն ընկալելի եւ քննարկելի: Ու այն պարագայում, երբ հակամարտող կողմերից մեկը չի մասնակցում այդ բանակցությունների գործընթացին, դա մաքսիմալ ձեւով նվազեցնում է գլոբար խաղաղության կամ գլոբալ հարցի կարգավորման ձեռքբերման հնարավորությունները: Սա է մոտեցումները, եւ նորից եմ ասում` գրքային ճշմարտությունն այնպես չէ, որ որեւէ մեկը ինչ-որ նոր բան է հորինում:

-ԱՄՆ Սենատի կողմից Հայոց ցեղասպանության ճանաչումը արդյոք ինչ-որ ձեւով լարվածությո՞ւն է մտցնելու Արցախյան հարցում: Ակնհայտ է, որ թուրքական կողմը իր ագրեսիան է ցույց տալիս այս օրերին ԱՄՆ-ի որոշման հետ կապված, դա կարո՞ղ է լարել նաեւ արցախյան հակամարտության հարցը:

-Չեմ կարծում, որ դա ագրեսիվ գործողությունների հիմք հանդիսանա, ընդամենը կարող ենք արձանագրել, որ ԱՄՆ-ի Սենատի եւ ընդհանրապես ժողովրդի կողմից նման թվով արձագանքը տեղի ունեցած ողբերգությանը, նկատի ունեմ Հայոց ցեղասպանութանը, չափազանց բարձր եմ գնահատում, եւ սա համամարդկային արժեք է այս բանաձեւի ընդունումը:

Միացյալ Նահագներում եւս մեկ անգամ ընդգծեցին, որ իրենք, այնուամենայնիվ, անկախ ամեն տեսակի շահարկումներից` կանգնած են համաշխարհային ժողովրդավարության, մարդու իրավունքների պաշտպանության եւ, առհասարակ, մարդկության դեմ գործող հանցագործությունները դատապարտելու գործընթացը քաջալերելու ակունքներում: Այս իմաստով ես բարձր եմ գնահատում այն, ինչը իրականացվեց, ու կարծում եմ, որ սա սկիզբն է, շատ մեծ քայլ էր մեզ համար: Ժամանակի հարց է, ես կարծում եմ, որ այս հարցը ամբողջությամբ մի օր կընդունի Թուրքիան, որովհետեւ այլ տարբերակ չկա:

-Ձեր իշխանությունների ձեռքբերումը չէր ԱՄՆ Սենատրի որոշումը, քանի որ, ընդդիմության կարծիքով, սա նոր իշխանությունների կատարած քայլերի արդյունքում չէ, որ նման որոշում կայացվեց: Սա տեղի ունեցավ տարածաշրջանային խնդիրներից ելնելով, որոշումը բխել է այդ ամենից ելնելով: Դուք կիսո՞ւմ եք այդ տեսակետը:

-Չէ, եկեք այդ դափնիները չորակենք մեր կամ նախկին կամ ապագայի ձեռքբերումներ, որովհետեւ, կարծում եմ, այս ուղղությամբ շատ քայլեր են արվել, չեմ կարող ամբողջությամբ որեւէ մեկին վերագրել այս հաղթանակը: Բայց կոնկրետ ցեղասպանության միջազգային ճանաչման գործընթացում եղել է հետեւողականություն նաեւ մեր կողմից, ունեցած ձեռքբերումներն էլ, այսպես ասած, փորձել ենք զարգացնել, եւ այստեղ շատ մեծ նշանակություն ունեն նաեւ աշխարհաքաղաքական իրավիճակը եւ տարածաշրջանում տեղի ունեցող զարգացումները:

Գիտեք, մենք պետք է մեկ բան հասկանանք, որ շատ կարեւոր է պատրաստ լինել, այսինքն` դու քաղաքական հարթակում պետք է քեզ հուզող հարցը բերես այնպիսի խմորման աստիճանի, երբ ստեղծվի հարմար իրավիճակ, դա դու փաթեթավորված մատուցես: Հիմա այս դեպքում սա մեր կողմից ճիշտ մատուցված, ճիշտ փաթեթավորված մի բանաձեւ էր, որ հաջողություն ունեցավ:

-Առաջիկայում Արցախում սպասվում են նախագահական եւ խորհրդարանական ընտրություններ, ու, ըստ Արցախում շրջանառվող տեղեկությունների, այն թեժ է լինելու: Դուք ի՞նչ կարծիք ունեք այս հարցում, հնարավո՞ր է լարվածություն լինի այս առումով ԼՂՀ-ում:

-Ես կարծում եմ, որ Արցախի ժողովուրդը այնքան խոհեմ է ու այնքան հասուն, որ Արցախի կայունությունը չի թողնելու, որ որեւէ կերպ սասանվի: Այս իմաստով ցանկացած քաղաքական ուժ առաջին հերթին պետք է հասկանա, որ դա վերաբերում է պետական կայունությանը եւ սահմաների անսասանությանը: Այս իմաստով չեմ կարծում, որ որեւէ մեկ ուժ կարող է հանդգնել այնպիսի մի զանցանքի, ինչպիսինն է ապակայունությունը, դա առաջին հերթին անվտանգության հարց է: Ես լավատես եմ, կարծում եմ` այս հարցում որեւէ տեսակի խժդժություն չի լինելու, մեր միասնական ժողովուրդն այս ամենից զերծ կմնա:

Զրուցեց ՍՈՆԱ ԳՐԻԳՈՐՅԱՆԸ