ՀԱՐՑ. Հետաքրքիր է իմանալ, թե գոյություն ունեցող պատմամշակութային հուշարձաններից որոնք են համարվում հրատապ վերանորոգման կարիք ունեցող (կխնդրեի տրամադրել առաջին 3-ի ցանկը), եւ կոնկրետ ինչ է արվում այդ ուղղությամբ:
ՊԱՏԱՍԽԱՆ. Հրատապ վերականգնման կարիք ունեցող օբյեկտների ցանկում ընդգրկված են հիմնականում հետեւյալ պատմամշակութային հուշարձանները`
• ՀՀ Արագածոտնի մարզի Հարթավան գյուղի Աստվածընկալ վանք (Սուրբ Նշան եկեղեցու եւ գավիթի վերականգնում),
• ՀՀ Արագածոտնի մարզի Ավան գյուղի Սուրբ Աստվածածին եկեղեցի (նախագիծ, մասնակի վերականգնում, ամրակայում),
• ՀՀ Լոռու մարզի Քոբայրավանք համալիր (զանգակատան-տապանատան վերականգնում),
• ՀՀ Սյունիքի մարզի Կապան քաղաքի Հալիձորի բերդ (մասնակի վերականգնում, ամրակայում, բարեկարգում),
• ՀՀ Լոռու մարզի Սանահին համայնքի Սանահինի վանք (նախագծում, տանիքների վերականգնում),
• ՀՀ Կոտայքի մարզի Բուժական համայնքի Թեղենյաց վանք (գավիթի, Կաթողիկե եկեղեցու, գրատան-գրչատան վերականգնում, ամրակայում),
• ՀՀ Վայոց ձորի մարզի Արտաբույնք համայնքի Ցախաց քարի վանք (ամրակայման, բարեկարգման աշխատանքներ),
• ՀՀ Վայոց ձորի մարզի Խաչիկ գյուղի Քարկոփի վանք (վերականգնում),
• ՀՀ Տավուշի մարզի Գոշ գյուղի Գոշավանք, Մ.Գոշի դամբարան (վերականգնում):
Արեւ Սամուելյան
«ԺՈՂՈՎՈՒՐԴ». Ցավոք, ցանկն անսպառ է թվում: Վերհիշելով հայրենի բնաշխարհում գտնվող պատմամշակութային հուշարձանների գտնվելու վայրերն ու անունները, անկեղծ ասած, դժվար է դառնում առաջնայիններն ու երկրորդականներն իրարից տարբերելը: ՀՀ մշակույթի նախարարությունը հավանաբար ցանկը կազմել է` ելնելով տվյալ պատմամշակութային հուշարձանի մաշվածության եւ քանդվածության աստիճանից: Այսուհանդերձ, անկասկած է, որ ցանկը լիարժեք չէ: Սակայն եթե գոնե ներկայացված ցանկում առկա բոլոր շինությունները պատշաճ կերպով վերականգնվեն, արդեն իսկ զգալի քայլ կլինի մեր մշակութային ժառանգության պահպանության գործում: Հուսով ենք նաեւ, որ այս նպատակի համար հատկացվող բյուջետային միջոցներն ու նվիրատվությունները կաճեն:
.gif)
