Ըստ հրապարակման՝ Աննա Խաչատրյանը 2026 թվականի ապրիլի 13-ին Աշտարակի դատարանի տարածքում ենթարկվել է վիրավորանքների, սպառնալիքների և ֆիզիկական բռնության։ Չնայած քրեական վարույթի նախաձեռնմանը՝ դատախազը որոշում է կայացրել հանրային քրեական հետապնդում չհարուցելու մասին։
Որոշումը բողոքարկվել է դատական կարգով։ Մյուս դեպքը վերաբերում է Հրայր Խաչատրյանին, որը 2026 թվականի մայիսի 26-ին Կապանում, իր մասնագիտական գործունեության ընթացքում, ըստ իր հաղորդման, ենթարկվել է սպառնալիքների և բռնության։ Սակայն նոյեմբերի 6-ին նույն քրեական վարույթի շրջանակում հանրային քրեական հետապնդում է հարուցվել արդեն նրա նկատմամբ։
Փաստաբանների պալատի իրավունքների պաշտպանության հանձնաժողովը մտահոգություն է հայտնել իրավապահ մարմինների գործողությունների կապակցությամբ՝ պահանջելով ապահովել երկու դեպքերի օբյեկտիվ, բազմակողմանի և անաչառ քննությունը։
Հանձնաժողովը շեշտել է, որ փաստաբանի նկատմամբ բռնությունը, սպառնալիքները կամ մասնագիտական գործունեության համար հետապնդումը վտանգում են ոչ միայն փաստաբանի անկախությունը, այլև քաղաքացիների՝ արդյունավետ իրավաբանական օգնություն ստանալու իրավունքը։
























































































