Գործատուների միության նախագահ Գագիկ Մակարյանը, այսօրվա մամլո ասուլիսում խոսելով մեր երկրում աշխատողների իրավունքների պահպանման մասին, ասաց, որ մեր երկրի աշխատաշուկան տարբերվում է այլ երկրների աշխատաշուկայից. «Հայաստանում խոշոր արդյունաբերական ձեռնարկություները գտնվում են մարզերում, որտեղ աշխատողների քանակը քիչ է: Հայաստանում զբաղվածների մեծ մասը բաժին է ընկնում փոքր բիզնեսին` մոտ 220.000 քաղաքացի աշխատում է փոքր ձեռնարկություններում»,- նշեց պրն Մակարյանը:
Մակարյանի կարծիքով` պետք է վարել հարկային այնպիսի քաղաքականություն, որպեսզի խոշոր ձեռնարկություններում աշխատողների քանակը շատ լինի:
Ինչ վերաբերում է գործատու- աշխատող հարաբերություններին, պրն Մակարյանի խոսքով` Հայաստանում աշխատողների իրավունքները հաճախ ոտնահարվում են, քանի որ գործատուների միջև հավասար մրցակցություն չկա: Դրա պատճառով առաջանում է ստվերային աշխատուժ, և աշխատանքային պայմանագրեր չեն կնքվում:
Մակարյանի խոսքով, ցավոք, աշխատանքային պայմանագրերի կարևորությունն ու իմաստը հաճախ չեն ըմբռնում հենց գործատուները. «Նա միայն մտածում է, որ պատկան մարմինները եթե հայտնաբերեն ստվերային աշխատուժ, իրեն կտուգանեն և վերջ: Բայց չէ որ եթե այդ աշխատողին մի բան պատահի, ապա պատասխանատու է առաջին հերթին գործատուն»,- եզրափակեց Գ. Մակարյանը:
Սոնա Դավթյան
.gif)
