Այսօր ԱԺ նիստում քվեարկության դրվեց ԱԺ պատգամավորներ Միքայել Մելքումյանի, Նաիրա Զոհրաբյանի, Էլինար Վարդանյանի, Վահե Էնֆիաջյանի և Վահան Բաբայանի ներկայացրած «Արտոնագրային վճարների մասին» ՀՀ օրենքում լրացումներ կատարելու մասին օրենքի նախագիծը: Քվեարկության ժամանակ Ազգային ժողովում խառնաշփոթ սկսվեց:
Կողմ էր քվեարկել 47 պատգամավոր, իսկ դեմ` 42-ը: Պարզվեց՝ շատերը ճիշտ չէին քվեարկել: ԱԺ փոխնախագահ Էդուարդ Շարմազանովը նշեց, որ նորից է դնում քվեարկության: ԲՀԿ-ական պատգամավորները ծափահարեցին ստեղծված իրավիճակին:
ԱԺ նախագահ Գալուստ Սահակյանն էլ նշեց. «Ես զարմանում եմ, էդքան փոքր հնարավորությունից կարելի է՞ ուրախանալ: Եթե այդպես է, հաճախակի կտանք ձեզ նման հնարավորություն, որ ուրախանաք»: Շարմազանովն էլ նշեց. «Նենց չի, որ անցել էր նախագիծը, ո՛չ, չէ՛ր անցել, ուղղակի որպեսզի պրոբլեմ չլինի, նորից ենք դնում քվեարկության»:
Վարման կարգով հանդես ԱԺ ԲՀԿ պատգամավոր Տիգրան Ուրիխանյանը և պահանջեց հիմնավորել կրկնակի քվեարկությունը: Էդուարդ Շարմազանովը հիմնավորեց. «Ձեր խմբակցությունից երկու հոգի են սխալ քվեարկել, մեր խմբակցությունից վեց հոգի»:
«Եթե չի աշխատել սարքավորումը, չեն քվեարկել, կարող ենք նորից կազմակերպել քվեարկությունը»,- ասաց ԱԺ նախագահը: Նորից կազմակերպվեց քվեարկություն և ԲՀԿ-ականների օրենքը չանցավ:
«Պարոն Սեդրակյանի տեխնիկական կոճակը չի աշխատում»,- ծիծաղը չկարողացավ զսպել Շարմազանովը:
Տիգրան Ուրիխանյանը վարման օրենքով ձայն խնդրեց՝ ասելով. «Խոսքը գնաց քաղաքական՞, թե՞ տեխնիկական սխալի մասին, հազիվ մեկ անգամ լավ բան արեցիք, հետո միանգամից չեզոքացրեցիք, մարդիկ փորձառություն ունեն և քվեարկել են հօգուտ ժողովրդի»:
.gif)
