Հայկ Խանումյանն ու Բակո Սահակյանը հանդիպել են. ինչ է խոստացել ԼՂՀ նախագահը

Հունիսի 6-ին ծեծի ենթարկված ԼՂՀ ԱԺ պատգամավոր Հայկ Խանումյանը նախօրեին նախագահական նստավայրում հանդիպել է ԼՂՀ նախագահ Բակո Սահակյանի հետ: Վերջինս կրկին անգամ հավաստիացրել է, որ մեղավորները կպատժվեն, դեպքն էլ` կբացահայտվի: Այս մասին Խանումյանը նշեց ArmLur.am-ի հետ զրույցում:

Հայկ Խանումյանը մեզ հետ զրույցում նշեց, որ չնայած ձերբակալվածների հետ առերեսում տեղի չի ունեցել, սակայն ինքը լուսանկարով նայել է ու ճանաչել:  «Նոր ձերբակալությունների հարցում հավանաբար ինչ-որ խոչընդոտներ կան օբյեկտիվ պատճառներից ելնելով, տեսնենք: Չեմ ուզում մանրամասնել, որովհետեւ միգուցե իր մեջ նապաքննական գաղտնիք է պարունակում»,- ընդգծեց նա:

Հիշեցնենք, որ Հայկ Խանումյանի  ծեծի  դեպքը տեղի ունեցավ ԼՂՀ ՊԲ հիմնադիր Սամվել Բաբայանի` Արցախ մեկնելու հաջորդ օրը, երբ դրա նախորդ օրը Խանումյանը  Բաբայանին ՊԲ հրամանատար նշանակելու պահանջով ԼՂՀ նախագահի նստավայրի մոտ անցկացված բողոքի ակցիա էր իրականացրել: Ծեծի հետեւանքով կոտրվել էին պատգամավորի 3 կողոսկրերը, այտոսկրը, քիթը, 2 ողերի ելունները:

Հավելենք, որ թեև Հայկ Խանումյանն իր ծեծի մեջ կասկածվողների 7 տվյալ է տրամադրել ոստիկանությանը, սակայն դեպքից 10 օր անց ձերբակալվածներն ընդամենը 3-ն են:  Հունիսի 9-ին ձերբակալվել, ապա կալանավորվել էին եւս երկու հոգի՝ Ստեփանակերտի բնակիչներ, աշխարհազորայիններ՝ 1977թ. ծնված Միքայել Միքայելի Սահակյանը եւ 1968թ. ծնված Սերգեյ Գեորգիի Ավանեսյանը: Իսկ նախօրեին էլ ձերբակալվել է ՀՀ Երեւան քաղաքի բնակիչ, աշխարհազորային՝ 1968թ. ծնված Էրիկ Ռադիոնի Պողոսյանը։

Նաիրա Հովհաննիսյան