Ուկրաինան օգոստոսի 10-ի գիշերը Ռուսաստանի տարածքի ուղղությամբ իրականացրել է վերջին շրջանում ամենախոշոր անօդաչու թռչող սարքերի հարձակումներից մեկը։ Ռուսաստանի պաշտպանության նախարարության տվյալներով՝ հակաօդային պաշտպանությունը ոչնչացրել կամ որսացել է 456 ուկրաինական ԱԹՍ՝ Ռուսաստանի 16 շրջաններում, Մոսկվայի մարզում, Կրասնոդարի երկրամասում, Թաթարստանում և օկուպացված Ղրիմում։
Ռուսաստանի տարբեր շրջանների իշխանությունները հայտնել են տասնյակ անօդաչուների խոցման մասին։ Մոսկվայի քաղաքապետ Սերգեյ Սոբյանինի խոսքով՝ մայրաքաղաքին մոտենալիս ոչնչացվել է 23 ԱԹՍ։
Հարձակման հետևանքով ամենածանր իրավիճակը գրանցվել է Թաթարստանի Նիժնեկամսկում, որտեղ իշխանությունների հաղորդմամբ՝ զոհվել է 13, վիրավորվել՝ 39 մարդ։ Թիրախում են եղել արդյունաբերական և քաղաքացիական օբյեկտներ։ Տեղական և ուկրաինական աղբյուրները պնդում են, որ հարվածներից մեկը կարող էր հասցվել խոշոր նավթաքիմիական համալիրին, սակայն այդ տեղեկությունը անկախ աղբյուրներով չի հաստատվել։
Հարձակումը տեղի է ունեցել այն ֆոնին, երբ Ռուսաստանը շարունակում է Ուկրաինայի ուղղությամբ ինտենսիվ հարվածները։ Վլադիմիր Զելենսկու տվյալներով՝ վերջին մեկ շաբաթում Ռուսաստանը Ուկրաինայի ուղղությամբ արձակել է ավելի քան 1560 հարձակողական ԱԹՍ, 61 հրթիռ և 1540 կառավարվող ավիառումբ։ Միայն Կիևում այդ ժամանակահատվածում զոհվել է 27 մարդ։
Ուկրաինան վերջին շրջանում ավելի հաճախ է կիրառում հեռահար ԱԹՍ-ներ՝ Ռուսաստանի ռազմական, էներգետիկ և արդյունաբերական օբյեկտներին հարվածելու համար՝ դրանք ներկայացնելով որպես պատասխան ռուսական շարունակական հարձակումներին։
.gif)
