ՀԱՐՑ. Զբաղվածության աջակցման ինչպիսի՞ ծրագրեր է իրականացնում զբաղվածության պետական ծառայությունը:

ՊԱՏԱՍԽԱՆ. Զբաղվածության պետական ծառայության կողմից իրականացվող ծրագրերը հետեւյալն են` գործազրկության նպաստի վճարումը, գործազուրկների մասնագիտական ուսուցումը, աշխատանք փնտրող չզբաղված հաշմանդամների մասնագիտական ուսուցումը, աշխատանքային ունակությունների վերականգնումը, գյուղատնտեսական նշանակության հողի սեփականատեր հանդիսացող աշխատանք փնտրող անձանց մասնագիտական ուսուցումը, երկարամյա ծառայության, արտոնյալ պայմաններով եւ մասնակի կենսաթոշակ ստացող աշխատանք փնտրող չզբաղված անձանց վերամասնագիտացումը, այլ վայր աշխատանքի գործուղման կապակցությամբ գործազուրկների եւ աշխատանք փնտրող չզբաղված հաշմանդամների նյութական ծախսերի հատուցումը: Ինչպես նաեւ` վարձատրվող հասարակական աշխատանքների կազմակերպումը, ձեռնարկատիրական գործունեությամբ զբաղվելու նպատակով պետական գրանցման համար գործազուրկներին եւ աշխատանք փնտրող չզբաղված հաշմանդամներին տրամադրվող ֆինանսական աջակցությունը, աշխատաշուկայում անմրցունակ անձանց աշխատանքի ընդունելիս աշխատավարձի մասնակի փոխհատուցումը գործատուին, աշխատանքի տոնավաճառների կազմակերպումը, աշխատանքի ակումբների կազմակերպումը, մասնագիտություն ունեցող, սակայն աշխատանքային փորձ չունեցող գործազուրկների եւ աշխատանք փնտրող չզբաղված հաշմանդամների աշխատանքային պրակտիկայի կազմակերպումը գործատուի մոտ, աշխատանք փնտրող չզբաղված հաշմանդամների համար աշխատատեղերի հարմարեցումը գործատուի մոտ, աշխատաշուկայի հետազոտման եւ կանխատեսման աշխատանքների   կազմակերպումը, թաղման նպաստի վճարումը:

«ԺՈՂՈՎՈՒՐԴ». ՀՀ-ում աճել է գրանցված գործազուրկների թիվը: ԱՎԾ-ի տվյալները փաստում են, որ անցած տարի պաշտոնապես գրանցված գործազուրկների թիվը կազմել է 90.3 հազար: Ընդհանուր հաշվարկով, 2011թ. հետ համեմատած, 2012թ. պաշտոնապես գրանցված զբաղվածների թիվը նվազել է 15.7 հազարով: