Անվտանգության խորհրդի քարտուղար Արմեն Գրիգորյանը վստահ է, որ Սահմանադրական դատարանի շուրջ ստեղծված իրավիճակին լուծում տալու համար գործադիրն ու օրենսդիրը համատեղ քայլեր կձեռնարկեն: «Արմենպրես»-ի հաղորդմամբ՝ լրագրողների հետ զրույցում Գրիգորյանը կարծիք հայտնեց՝ սահմանադրական փոփոխությունները կարող են լուծման մի ճանապարհը լինել:
«Լուծման մասին երեկ վարչապետն ընդհանուր առմամբ խոսել է, և կարծում եմ և՛ գործադիրը, և՛ օրենսդիրը համատեղ քայլեր կձեռնարկեն, որպեսզի ճգնաժամին լուծում տան»,- ասաց նա:
Հարցին, թե իշխանություններն ինչ են ձեռնարկելու այդ ուղղությամբ՝ նա նշեց՝ իրավիճակին լուծում տալու ցանկացած քայլի մասին տեղյակ կպահեն, քննարկումներն ընթանում են: Գրիգորյանը նկատեց՝ քայլեր արդեն եղել են, հիշեցրեց վերջերս ընդունված նախաձեռնությունը, որով հնարավորություն է տրվում Սահմանադրական դատարանի դատավորներին իրենց ցանկության դեպքում վաղ կենսաթոշակի ուղարկել: Գրիգորյանը նշեց նաև ԱԺ-ի կողմից ձեռնարկած քայլերի մասին: «Բոլորը նպատակ ունեին հենց ճգնաժամը լուծել: Բայց քանի դեռ լուծում չի ստացել, շարունակելու են քայլեր ձեռնարկել»,- ասաց Գրիգորյանը:
Հիշեցնենք՝ ՀՀ վարչապետ Նիկոլ Փաշինյանը հունվարի 25-ին Կապանում հրավիրված մամուլի ասուլիսի ընթացքում հայտնել էր, որ Հրայր Թովմասյանն իր ծառայություններն է առաջարկել իրեն: Այս հայտարարությունը, սակայն, հերքել էր Թովմասյանը: Հունվարի 27-ին «Ֆեյսբուք»-ի իր էջում ուղիղ եթերի ընթացքում ՀՀ վարչապետը նշել է, որ անառարկելի փաստ է այն, որ Հրայր Թովմասյանն Ազգային ժողովում ՍԴ նախագահ է ընտրվել կեղծիքի միջոցով:
.gif)
