ԼՈՒՐ ԿԱԴՐ            

Լուսանկարը՝ համացանցից

Երեւանի Աջափնյակ վարչական շրջանը շարունակում է մնալ աղբի ու գարշահոտության մեջ: Օրեր շարունակ չեն դատարկվում աղբամանները, աղբը թափված է ամենուր, իսկ վարչական շրջանի ղեկավարը չի էլ մտածում  լուծել աղբահանության խնդիրները: Ամբողջ վարչական շրջանով մեկ աղբակույտեր են, աղբամաններից աղբը դուրս է թափվում, այն էլ՝ տուրիստական այս թեժ շրջանում։

ԵՐԿՐԱՇԱՐԺ

ՀԱՐՑ. Ի՞նչ է պետք անել երկրաշարժի ցնցումների ժամանակ, ո՞րն է բնակարանի ամենաանվտանգ տեղը:

Քնարիկ Զոհրաբյան (17 տարեկան)

ՊԱՏԱՍԽԱՆ. Եթե գտնվում եք  բարձր հարկերում, պետք է կանգնել հիմնական կրող պատերից կազմված անկյուններում, դրանցում գտնվող դռան բացվածքներում, կրող սյուների մոտ, արտաքին պատերից եւ պատուհաններից հեռու:

ՀՀ ԱԻՆ

«ԺՈՂՈՎՈՒՐԴ». Եթե ցնցումների ժամանակ  գտնվում եք շենքի 1-3 հարկերում, պետք է արագ դուրս գալ շենքից:

ԱՄՈՒՍՆՈՒԹՅՈՒՆ

ՀԱՐՑ. Ինչպե՞ս կարող ենք ստանալ ամուսնության վկայական:

Սոնա Հովեյան  (23 տարեկան)

ՊԱՏԱՍԽԱՆ.  Ամուսնության վկայական ստանալու համար հարկավոր է դիմել ՀՀ ԱՆ ՔԿԱԳ (ԶԱԳՍ) տարածքային բաժին եւ ներկայացնել հետեւյալ փաստաթղթերը`

1. ամուսնացողների անձնագրերը եւ նրանց պատճենները,
2. ծննդյան վկայականները եւ նրանց պատճենները,
3. զինգրքույկը եւ պատճենը,
4. պետտուրիքի վճարված անդորրագիրը:

Այնուհետեւ ամուսնացողների կողմից լրացվում է ՔԿԱԳ բաժնի աշխատակցի կողմից տրված համապատասխան դիմումի ձեւը: Աշխատակցի կողմից (1 ամսվա ընթացքում) ստուգվում է դիմումի մեջ լրացված տվյալները եւ նշանակվում ներկայանալու օրը (զագսավորման օրը): Քաղաքացիները պարտավոր են ներկայանալ նշանակված օրը:

ՀՀ ԱՆ ՔԿԱԳ ծառայություն

«ԺՈՂՈՎՈՒՐԴ». Զագսավորման արարողությունից հետո ստանում են ամուսնության վկայական: Եթե քաղաքացիները ցանկանում են հանդիսավոր ամուսնություն, ապա նախօրոք պետք է տեղեկացնեն ՔԿԱԳ բաժնի պետին: