Դեկտեմբերի 6-ին կայանալիք Սահմանադրության փոփոխությունների հանրաքվեի ընթացքը դիտարկելու նպատակով Հայաստան են ժամանել ԱՊՀ ՄԽՎ դիտորդները՝ Ակրամշո Ֆելալիեւի ղեկավարությամբ:
Դիտորդական առաքելությամբ Հայաստան ժամանած խմբի անդամները դեկտեմբերի 5-ին հանդիպել են Ազգային ժողովի փոխնախագահ Հերմինե Նաղդալյանի հետ:
Հանդիպման ընթացքում կողմերը քննարկել են միջխորհրդարանական հարթակներում ԱՊՀ անդամ երկրների համագործակցությանը, սահմանադրական բարեփոխումներին վերաբերող հարցեր, կարեւորել առաջիկա հանրաքվեի արդար, թափանցիկ, ազատ եւ ժողովրդավարական չափանիշներին համապատասխան անցկացումը: Հանդիպմանն անդրադարձ է կատարվել նաեւ ԱՊՀ ՄԽՎ դիտորդների կողմից դեկտեմբերի 6-ին՝ հանրաքվեի օրը, Երեւանում եւ հանրապետության մարզերի ընտրատեղամասերում իրականացվելիք մշտադիտարկման աշխատանքներին:
Նույն օրը ԱՊՀ ՄԽՎ դիտորդների հետ հանդիպել են նաեւ ԱԺ ՀՀԿ խմբակցության անդամներ Արտակ Դավթյանը, Արաիկ Հովհաննիսյանը եւ ԱԺ ԲՀԿ խմբակցության անդամ Վահան Բաբայանը: Այնուհետեւ դիտորդների հետ հանդիպել են նաեւ ԱԺ ՀԱԿ խմբակցության ղեկավար Լեւոն Զուրաբյանը եւ ԱԺ ՕԵԿ խմբակցության քարտուղար Մհեր Շահգելդյանը:
Հանդիպման ընթացքում քննարկվել են քարոզարշավի ընթացքին եւ ժամանակահատվածին վերաբերող հարցեր: Երկուստեք կարեւորվել է ազատ եւ թափանցիկ ընտրության անցկացումը եւ Հայաստանում իրականացվող ժողովրդավարական գործընթացներում առաջընթացի գրանցումը: ԱԺ պատգամավորները հյուրերին ներկայացրել են նախընտրական գործընթացի, մասնավորապես առաջիկա հանրաքվեի կազմակերպման վերաբերյալ իրենց մոտեցումներն ու մտահոգությունները:
Քննարկվել են խորհրդարանական կառավարման մոդելին եւ դրա առանձնահատկություններին առնչվող հարցեր:
Հանդիպումների ավարտին ԱՊՀ ՄԽՎ պատվիրակության ղեկավար Ակրամշո Ֆելալիեւը հանդես է եկել մամլո ասուլիսով:
.gif)
