Ո՞վ է Էկոնոմիկայի նորանշանակ փոխնախարար Տիգրան Գասպարյանը

ArmLur.am-ը տեղեկացավ, որ 2026 թվականի սեպտեմբերի 2-ից ՀՀ էկոնոմիկայի նախարարի տեղակալ է նշանակվել Տիգրան Գասպարյանը։ Նորանշանակ փոխնախարարը մասնագիտությամբ տնտեսագետ է, սակայն ունի նաև խաղաղության և անվտանգության ուսումնասիրությունների մագիստրոսի կրթություն և տարբեր տարիներին աշխատել է բիզնեսի, պետական կառավարման ու միջազգային կազմակերպությունների ոլորտներում։

Տիգրան Գասպարյանը ծնվել է 1996 թվականի մարտի 5-ին՝ Մոսկվա քաղաքում։ 2017 թվականին գերազանցությամբ ավարտել է ՌԴ կառավարությանն առընթեր Ֆինանսական համալսարանը՝ ստանալով տնտեսագիտության բակալավրի աստիճան։ 2019 թվականին Համբուրգի համալսարանում՝ Խաղաղության և անվտանգության հետազոտությունների ինստիտուտի հետ համատեղ, ստացել է «Խաղաղության և անվտանգության ուսումնասիրություններ» մասնագիտությամբ մագիստրոսի աստիճան։

Գասպարյանի աշխատանքային փորձը ներառում է ինչպես մասնավոր, այնպես էլ պետական և միջազգային կառույցներ։ 2024-2026 թվականներին նա աշխատել է «Յանդեքս»-ում՝ Հայաստանում և Վրաստանում պետական մարմինների հետ կապերի տնօրենի պաշտոնում։

2025-2026 թվականներին միաժամանակ ղեկավարել է Երևանի պետական համալսարանի Ժողովրդագրական հետազոտությունների և կրթության կենտրոնը։ 2026 թվականին աշխատել է նաև Համաշխարհային բանկում՝ որպես հանրային կառավարման ոլորտի կարճաժամկետ խորհրդատու։

Մինչ այդ՝ 2022-2024 թվականներին, Տիգրան Գասպարյանը եղել է «Ամերիա» ՓԲԸ կառավարման խորհրդատվական ծառայության հանրային և բիզնես կառավարման խորհրդատու։

2019-2021 թվականներին աշխատել է ՀՀ Ազգային ժողովում՝ որպես խմբակցության խորհրդական՝ կամավոր հիմունքներով։ Այդ աշխատանքը համատեղել է Համբուրգի համալսարանում մագիստրոսական ուսումնառության հետ։

Մինչ այդ՝ 2017-2018 թվականներին, աշխատել է «Ալֆա բանկ» ԲԲԸ-ում՝ որպես միջազգային համապատասխանության ապահովման մասնագետ, իսկ 2016-2017 թվականներին՝ «Քեյ-Փի-Էմ-Ջի» ՓԲԸ-ում՝ որպես աուդիտի մասնագետ։

Գասպարյանը դեռևս 2013-2017 թվականներին աշխատել է «ԲԱԱՈ» ՍՊԸ-ում, որը զբաղվում է ֆինանսական խորհրդատվությամբ, որտեղ եղել է բիզնեսի զարգացման և ռազմավարության ղեկավար։

Նորանշանակ փոխնախարարը նաև գիտական գործունեություն ունի․ նա երկու գիտական մենագրության համահեղինակ է։

Տիգրան Գասպարյանը ամուսնացած է, ունի երկու որդի և մեկ դուստր։ Ազատ տիրապետում է անգլերեն և ռուսերեն լեզուներին։

2026 թվականի սեպտեմբերի 2-ից Տիգրան Գասպարյանը պաշտոնապես ստանձնել է ՀՀ էկոնոմիկայի նախարարի տեղակալի պաշտոնը։

Անի Վարդանյան